Hijaab Dec-16

حمد و نعت

ریاض حسین قمر/سید نصیرالدین

حمد باری تعالیٰ

ہو صحرا‘ دشت ہو یا کوئی بستی
تری رحمت کی ہے بارش برستی
بنائے لفظِ کن سے دونوں عالم
بنائی ہے بلندی اور پستی
جہاں میں ہر جگہ ہے ذات تیری
مگر صورت کو ہے دنیا ترستی
نہیں تجھ سا کوئی دونوں جہاں میں
تری ہستی ہے سب سے پاک ہستی
عطا کردی کسی کو بادشاہی
کسی کو بخش دی ہے فاقہ مستی
بڑا بدبخت ہے انسان خدایا
تجھے چھوڑے کرے جو بُت پرستی
یقینا قادرِ مطلق ہے تُو ہی
مکرم اور معظم تیری ہستی

ریاض حسین قمر… منگلا ڈیم

نعت رسول مقبول صلی اللہ علیہ وسلم

احمد کہوں کہ حامدِ یکتا کہوں تجھے
مولیٰ کہوں کہ بندۂ مولیٰ کہوں تجھے
کہہ کر پکاروں ساقی ٔ کوثر بروزِ حشر
یا صاحبِ شفاعتِ کبریٰ کہوں تجھے
یا عالمین کے لیے رحمت کا نام دوں
یا پھر مکینِ گنبدِ خضریٰ کہوں تجھے
ویراں دلوں کی کھیتیاں آباد تجھ سے ہیں
دریا کہوں کہ ابر سخا کا کہوں تجھے
ہے ممتنع نظیر‘ تری ذات خلق میں
پھر کیاکہوں تجھے جو نہ تجھ سا کہوں تجھے
پاکر اشارہ سورۃ یٰسیں کا اس طرف
دل چاہتا ہے سید والا کہوں تجھے
سرتاجِ انبیاء کہ اماں گاہِ اولیا
یا فکرِ نسلِ آدم و حوا کہوں تجھے

حضرت صاحبزادہ سید نصیر الدین گولڑوی

Show More

Check Also

Close
Back to top button
error: Content is protected !!
×
Close